ዜጎች ዋስትና ይፈልጋሉ!

           ዜጎች ዋስትና ይፈልጋሉ!

      ሀገራችን ብለን በምንጠራት የኢትዮጵያ ድንበር ክልል ውስጥ በሁሉም አቅጣጫ እየታዩ ያሉ ችግሮች ከእለት ወደ እለት አሳሳቢ እየሆኑ መጥተዋል። ድህነት፣ የብሄር ግጭት፣ ፖለቲካዊ አለመስማማት፣ የጤና ችግር፣ የድንበር ግጭት፣ የማህበራዊ ዋስትና እጦት፣ የመሬት ቅርምትና ስደት ከሩቅ የምንሰማው ብቻ ሳይሆን አይናችን የሚመለከተው ሀቅ ከሆነ አርፍዷል። እነዚህ ደግሞ ማህበረሰባችን እንደ ምሰሶ ሆነው አቁመውታል ብለን የምናስበውን መሠረታዊ ትስስሮሽ ቀስ በቀስ እያፈራረሱት ይገኛሉ። ከነዚህ ከተጠቀሱት ችግሮች በተጨማሪም የወጣቶች ስራ ማጣት በእንቅርት ላይ ጆሮ ደግፍ እንዲሉ ከድህነት አረንቋ መውጣት ያልቻለችው ሀገራችን የምትሸከመው ሌላ ዕዳ ሆኗል።

    በዚህ በኛ ዘመን አንድ ሀገር፣ እንደሀገር ለመቆም ከሚያስፈልጓት መደላድሎች መካከል የተማረና የሰለጠነ የሰው ሀይል ቀዳሚ መሆኑ ይታወቃል። ይሄ የማህበረሰብ ክፍል እጥረት በሚታይባቸው የሥራ ክፍተቶች ውስጥ ፍላጎቶችን በማሟላት ጥሎን ከሄደው አለም ጋር ለመጠጋጋት ብሎም ለመፎካከር ወሳኝ ጉልበት በመሆን ያገለግላል። ይህንን እውነት ኢሃዴግ ቢሆን በሚገባ ይረዳዋል።  ከዚህ አኳያ ነው ተሞክረው የሚከሽፉ የልማት ፖሊሲዎች ለእነዚህ ወጣቶች የስራ ዕድል መፍጠር አለመቻላቸው እየታወቀ በሌላ ጊዜ ውድቀት በሚያስከትሉ ፖሊሲዎች የሚተኩት? እንደምንስ ሆኖ ነው የተተኪ ትውልዱን ተስፋ በታላላቅ ሥራ አጥ ወንድሞቹ ክስረት ውስጥ የምናንፀው? ብዬ መጠየቅ እፈልጋለሁ፡፡

            በከተሞች ከሚገኘው ኢትዮጵያዊ ወጣት መካከል  40%  የሚሆነው ሥራ አጥ ሆኖ እያለ ተጨማሪ የእድሜ እኩዮቻቸው ደግሞ በዚህ በበቂ ሁኔታ ፍላጎትና አቅርቦት ባልተጣጣሙበት ሀገር ውስጥ ከሚገኙ ሰላሳ አንድ ዩኒቨርስቲዎች እየተመረቁ ይገኛሉ። ስራ በአባልነትና በደጋፊነት መስፈርት በሚለካበት ነባራዊ ሁኔታ የእነዚህ ወጣቶች ማረፊያ የት ይሆን? የሚለው ጥያቄ እኔን ያሳስበኟል።

           በየዓመቱ በአማካይ ሁለት ሚሊዮን የሚሆኑ ወጣቶች ስራ ፍለጋ ወደ ገበያው ቢመጡም፤እኒህን ዜጎች በበቂ ሁኔታ ሊቀበል የሚችል ኢኮኖሚያዊ ስርዓት ኢሃዴግ አልዘረጋም። በዚህ ጉዳይ ላይ ያጠኑ ምሁራን፣ በየጊዜው እየናረ ለመጣው ሥራ-አጥነት በዋነኛነት ሁለት ምክንያቶችን ያቀርባሉ ኢሃዴግ እየሰማ ባይሆንም ቅሉ። ከላይ የጠቀስኩትን ያህል ወጣቶችን የሚያቅፍ የሠራተኛ ፍላጐት ኢኮኖሚያዊ መዋቅር አለማበጀቱ፤ ጥቂት ዜጎች ብቻ የሥራ ዕድል የሚያገኙበት አሳዛኝ ሁኔታ ተፈጥሯል። ይህን አስከፊ ሁነት እያባባሰው የመጣው መሰረታዊው ጉዳይ ደግሞ፣ ኢሃዴግ አለ የሚለው ኢኮኖሚያዊ ዕድገት ተጨባጭ ለውጥ ያለማምጣቱ ነው። ሁለተኛው ተጠቃሽ ምክንያት የትምህርት ፖሊሲው ሲሆን፣ ከጥራት ይልቅ ብዛትን ግቡ ያደረገው ፖሊሲ፤ በኢኮኖሚው ውስጥ ያሉ የግልም ሆነ የመንግሥት ተቋማት በሚፈልጉት ልክ የሰለጠነ የሰው ሀይል ለማግኘት እንዲቸገሩ አድርጓቸዋል። የሚመለከታቸው የመንግሥት አካላትም እነዚህ ስረ ምክንያቶች እጅግ በጥንቃቄ እንዲያዩ ማሳሰብ እፈልጋለሁ።

            እኔ ጉዳዩን ኢሃዲግ በከፍተኛ አትኩሮት እንዲያየው እሻለው፣ እየተባባሰ የመጣው ስራ-ዓጥነት፣ የፈጠራቸውን እና ሊፈጥራቸው የሚችላቸውን ሀገራዊ ቀውሶች ከግምት በማስገባት ነው። ሁላችንም እንደምናውቀው በስራ አጥነት የሚባዝኑ የተማሩ ከተሜ ወጣቶች፣ ሥራ ከማጣታቸው የተነሳ ራሳቸውንም ሆነ ማኅበረሰቡን ወደሚያቃውሱ ድርጊቶች መሻገር ከጀመሩ ሰነባብተዋል። ይህ በጎ ያልሆነ አዝማሚያም፣ ሀገሪቱንም ሆነ ማኅበረሰባዊ ስርዓቱን ሊያናጋው ይችላል። ከዚህ በተጨማሪም፣ ስራ ከማጣት የሚመጣውን ቅጥ ያጣ ድህነት በመሸሽ፣ ወጣቶቻችን ሀገራቸውን ጥለው በአስከፊ ሁኔታ ለስደት እየተዳረጉ ነው። እናም ኢሃዴግ ለዚህች ሀገር እቆረቆራለሁ፣ ልማትን ማምጣት የተነሣሁበት ግብ ነው፣ በማለት በየጊዜው ከሚያደነቁረን፣ በአደገኛ ሁኔታ እየከፋ ለመጣው የወጣቶች ስራ-አጥነት እና ስደት መሰረታዊ መፍትሄ ይሰጠን ዘንድ ማሳሰብ እወዳለሁ። ሁኔታዎች በዚሁ የሚቀጥሉ ከሆነ ግን ማንም ከሚገምተው ውጪ ያለ ሀገራዊ አደጋ ሊከሰት ይችላልና አሁንም በድጋሚ ይታሰብበት ማለት እፈልጋለሁ።

 Dawit Gessese