በአዲስ አበባ ለተቃውሞ አደባባይ የወጡ በመቶዎች የሚቆጠሩ ሰልፈኞች ታስረዋል።

 ኦሮሚያ በጸረ መንግሥት ሰልፎች ተሰንጋ ዋለች። በርካታ የክልሉ አካባቢዎች ዛሬ ጠዋትና ረፋዱን ሰልፍ ተካሂዶባቸዋል። ከዚህ ቀደም እንደሆነውም የመንግሥት ሃይሎች በሰነዘሩት ጥቃት ሰላማዊ ሰልፈኞች መገደላቸውና በብዛት መታሰራቸው እየተዘገበ ነው። በተወሰኑ የአማራ ክልል አካባቢዎችም ትናንት እና ሌሊቱን ሰልፎች ተካሂደዋል፣ በመሣሪያ የተደገፉ ግጭቶች እንደነበሩ ተዘግቧል።

በመላው ኦሮምያ ለዛሬ የተጠራውን ሰላማዊ ሰልፍ ተከትሎ በአዲስ አበባ ለተቃውሞ አደባባይ የወጡ በመቶዎች የሚቆጠሩ ሰልፈኞች ታስረዋል። በዝናብ ጨፍግጋ የነበረችው በነበረችው ከተማ ሰልፈኞቹ ወደ መስቀል አደባባይ የወጡት ወደ ረፋድ አራት ሰዓት ግድም እንድነበር የአካባቢው እማኞች ተናግረዋል። ብዙም ሳይቆይ ግን ስልፈኞቹ በአካባቢው በነበሩ የፌደራል እና የአዲስ አበባ ፖሊሶች ተሳደዋል፣ ብዙዎቹም ታስረዋል። በተመሳሳይም በየሰፈሩ ሕዝብ ሊቀሰቅሱ ይችላሉ የተባሉ ወጣቶች እየተለቀሙ መሆናቸውን የዋዜማ ምንጮች ገልጸዋል።

ለተቃውሞ የወጡት ሰልፈኞች አብዛኞቹ ወጣቶች ናቸው። መፈክር የተጻፈባቸው ባነሮችን ይዘው የነበር ሲሆን ከእስር በኋላ ባነሮቹ ቅዱስ ዮሴፍ ትምህርት ቤት አቅራቢያ ባለው የመስቀል አደባባይ ክፍል በአንድ ቦታ ተከማችተው ይታያሉ። በአጠገባቸውም የወለቁ ጫማዎች እና ጌጣጌጦች እዚህም እዚያም ተበታትነው እንደሚታዩ እማኞች ገልጸዋል። ፖሊሶች ሰልፈኞችን እያሳደዱ ሲደበድቡና ሲያስሩ የሚያሳዩ ቪዲዮዎች በማኅበራዊ ገጾች ተለቀዋል።