ሰማያዊ ፓርቲ ከምርጫ እንደወጣ ተደርጎ እየተቀሰቀሰ እንደሆን ታወቀ

• ‹‹ሰማያዊ በሚያደርገው ቅስቀሳ ስለተደናገጡ ያደረጉት ነው›› አቶ ስለሽ ፈይሳ

ሰማያዊ ፓርቲ ከ2007 ዓ.ም ምርጫ ራሱን አግልሏል በሚል አዲስ አበባ ውስጥ የተሳሳተ ቅስቀሳ እየተደረገበት እንደሆነ የሰማያዊ ፓርቲ ም/ሊቀመንበርና የምርጫ ጉዳይ ኃላፊ አቶ ስለሽ ፈይሳ ለነገረ ኢትዮጵያ ገለጹ፡፡ ማንነታቸውን ያልታወቁ አካላት ‹‹ሰማያዊ ፓርቲ በገዥው ፓርቲ በሚደርስበት ጫና ምክንያት ራሱን ከምርጫ ለማግለል ተገዷል›› የሚል መልዕክት እያስተላለፉ እንደሚገኝ የገለጹት ኃላፊው በዚህ በተሳሳተ ቅስቀሳ ምክንያት ከትናንት ጀምሮ ‹‹ከምርጫው ወጥታችኋል ወይ?›› በሚል ከዜጎች ጥያቄ እንደቀረበላቸው ገልጸዋል፡፡

ሆኖም ከምርጫው እንዳልወጡና አሁንም ቅስቀሳውን አጠናክረው እንደቀጠሉ ኃላፊው ገልጸዋል፡፡ ‹‹በትናትናው ዕለት ለኢህአዴግ ባስደነገጠ መልኩ በ8 መኪና ስንቀሰቅስ ውለናል፡፡ ዛሬና ነገም በተመሳሳይ መንገድ እንቀሰቅሳለን፡፡ በትናንትናው ዕለት ደማቅ ቅስቀሳ በማድረጋችን ኢህአዴግ ተደናግጧል፡፡ ሰማያዊ በሚያደርገው ቅስቀሳ ስለተደናገጡ ያደረጉት ነው፡፡›› ብለዋል፡፡