ፖለቲካዊ ማናለብኝነት እንደ ሥርዓት

ፖለቲካዊ ማናለብኝነት እንደ ሥርዓት

“ፍጹም ሥልጣን ፍጹም ያባልጋል” የሚለውን አነጋገር ኢትዮጵያውያን በተግባር እናውቀዋለን። ዴሞክርሲን የተመኘነውም የመንግሥት ሥልጣን የሚይዙ ቡድኖች እና ደጋፊዎቻቸው መባለጋቸው ባይቀርም ፍጹም እንዳይባልጉብን ያደርግልናል ብለን እንደሆነ የታወቀ ነው። ዴሞክራሲ ይህን ማረጋገጥ ከሚችልበት ደረጃ ከመድረሱ በፊት ከዚያ ብልግና ሊታደገን እንደማይችል በዚህ ምርጫ ታዝበናል።

ኢሕአዴግና የተወሰኑ አባሎቱ ከምርጫው በፊትም ሆነ በኋላ የሚያሳዩት ማናለብኝነት ለደጋፊዎቻቸው ጭምር አሳፋሪና አስጊ ነው።የቀድሞው ጠቅላይ ሚኒስቴር አቶ መለስ ከምርጫው በፊት በፓርላማ ቀርበው “ከምርጫው በኋላ እናስራችኋለን” እያሉ የሚያስፈራሩት፤ የአሁኑ ደግሞ “ምህረታች ገደብ ስለሌለው አናስራችሁም አትፍሩ” እያሉ የሚናገሩት ተተኪዎቻቸው የፍጹም ሥልጣን ባለቤትነት በእጃቸው ስለገባ ብቻ ነው። ስለዚህም ፍጹም ለመባለግ የሚያስችለው ነገር ሁሉ ለእርሳቸውና ለፓርቲያቸው ተመቻችቷል። አንድ መጥፎ ምልክት “ሁሉም ነገር የኢሕአዴግ እና ለኢሕአዴግ ብቻ” የሚለው ነው።

የምርጫው ተሞክሮ ለኢሕአዴግ የሚያስተላልፈው ተሞክሮ የተለያየ ነው። ለአቶ ሃይለማርያም ና ለፓርቲው ከፍተኛ አመራሮች፣ ምናልባት ተመሳሳይ በስም ዴሞክራሲያዊ የሚመስሉ በተግባር ግን ያለምንም ጥርጥር የእነርሱን አሸናፊነት የሚያረጋግጡ ተመሳሳይ የ“ምርጫ ድራማዎች” እየሠሩ ለረጅም ጊዜ ሥልጣን ላይ መቆየት እንደሚቻል ይሰማቸው ይሆናል። በእነዚህ ድራማዎች ተቃዋሚ ነኝ ለሚለው “የማይጠፋበት ግን የማያሻንፍበት፤ የሚኖርበት ነገር ግን የማይጠናከርበትን” መድረክ እየፈጠሩ የድራማው ዘላቂ ተዋናይ ማድረግ እንደሚቻል የባለፈው ተሞክሮ አስተምሯቸው ይሆናል። ዓለም አቀፉ ማኅበረሰብም ሶማልያ እስካልተረጋጋች ድረስ ኢትዮጵያን ማጣት ስለማይፈልግ ቅሬታው በድራማው አተዋወን ላይ እንጂ በጭብጡ ላይ አለመሆኑን እየቆየ የሚረሳው “የተቃውሞ፣ የአሳስቦናል…” መልእክት አራጋጋጭ ነው።

ለኢሕአዴግ የበታች ሹማምንት በፓርቲያቸው የተላለፈው መልእክት ደግሞ፣ “ከፓርቲው ጋራ እስከቀጠላችሁ በየመስኩ የምታገኙት የግል ጥቅም ሳያቋርጥ ይቀጥላል፤ ሌላ ኀይል ከመጣ ግን የጥቅሙ መቆም ብቻ ሳይሆን ሕልውናችሁም ጥያቄ ውስጥ ይገባል” የሚል ነው። በዚህ ላይ ደግሞ ብሔረሰብን መሠረት ያደረገው የጥርጣሬ እና “መጣብህ ሊበላህ ነው…ደረስኩልህ” የሚለው ውስጥ ውስጡን የሚግም እሳት ይጨመርበታል። ይህም የፖለቲካ ልሒቁ በጥቅምና በፍርሃቱ እንዲታሰር ያደርገዋል። እንግዲህ እነዚህ ሹመኞች፣ አቶ በረከትን ተከትለው “ እንገናኛለን” እያሉ ቢዝቱ ምን ይፈረድባቸዋል? ፍርሃታቸውን ያስቀሩ፣ በዚያውም የኢኮኖሚያዊ ጥቅሞቻቸውን ዘላቂነት ያረጋገጡ እየመሰላቸው መብት ቢጥሱ፣ ተቃዋሚዎችን ቢያፍኑ፣ የታዘዙትን ሁሉ ያለማመንታት ቢፈጽሙ ቀጣዩን ጉዞዋቸውን  የበለጠ ድንቅ አደርጉት ማለት አይደለም?

ሌላው መልእክት በኢሕአዴግ ዙሪያ በመሰባሰብ ላይ የሚገኘው የኢኮኖሚ ፍላጎት ያለው ኀይል ነው። ይህ ኀይል በአድሎ ላይ በተመሠረተ አሠራር የሚያገኘው ጥቅም የሚጠበቅለት ኢሕአዴግ እስካለ ድረስ ብቻ እንደሆነ ወደሚያምንበት ደረጃ ለመድረስ ብዙ ጊዜ አይፈጅበትም። ሚሊዮኖችን እያወጣ ለፓርቲው የሚሰጠውም ይህን ስለሚረዳ ነው። በተቃራኒው ለተቃዋሚዎች በግልጽም ይሁን በስውር ድጋፍ ማድረግ ቅጣት ሊያስከትለበት እንደሚችል ያምናል። የዚህ ድምር ውጤትም የአንድ ፓርቲ ፓለቲካዊ ማንአሎንነት እየሆነ ነው። ማንአለብኝነቱ የሚያስከትለው “ብልግና” ምን ሊሆን እንደሚችል እያየነው ነው።

በአጠቃልይ ሲታይ የኢትዮጵያ የዴሞክራሲ ሽግግር ከማይወጣበት ቅርቃር ውስጥ ገብቷል። አሁን ፈተናው ይህ ሽግግር “ከተሞከረ ይቻላል” የሚል እምነት አሳድሮ የነበረውን እና ኢሕአዴግ በተከታታይ በሚወስዳቸው እርምጃዎች ወደ ተስፋ መቁረጥ እየተገፋ ያለውን በርካታ ዜጋ ማሳመን ጭምር ሆኗል። በዚህም ምክንያት አገር ውስጥ ያሉት ተቃዋሚዎች ፈተናም በብዙ እጥፍ ይጨምራል። የዴሞክራሲያዊ ሽግግር ተስፋ እጅግ እየራቀ ነው። ከእይታችን ፈጽሞ ወደ መሰወር እየቀረበም ነው። ተስፋው ግን አይጠፋም፤ ሊጠፋ አይችልምና። “ተሰለጠነና…” አሉ!

ከአንድናት ኢትዮጵያ ብሎግ

ኢትዮጵያ በክብር ለዘላለም ትኑር!